Numbers 26

Keriaun Wadawad en Aramas

1Mwurin soumwahu lusuluso, KAUN-O ketin mahsanihong Moses oh Eleasar, nein Aaron, ^a 2“Kumwa wiahda wadawad en peneinei kan en mehn Israel koaros, ohl koaros me mahkier sounpar rieisek kohda me kak wia doadoahk en sounpei.” 3Moses oh Eleasar ahpw kapwaiada, ira eri kapokonepene ohl koaros me mahkier sounpar rieisek kohda. Re ahpw pokonpene nan patapat en Mohap ni keilen Pillap Sordan sallahng Seriko.

Iet kan mehn Israel me kohdohsang Isip:

5Kadaudok en Reupen (Reupen, iei nein Seikop mesenih): peneineien Anok, Pallu, 6Esron oh Karmi. 7Peneinei pwukat koaros patpene 43,730 ohl. 8Peneineien Pallu iei Eliap 9oh nah pwutak kan iei Nemuel, Dadan, oh Apiram. (Deidan oh Apiram, iei ira me pilipildahr sang rehn mehn Israel kan. Ira me uhwong Moses oh Aaron oh iangala iengen Kora ko ni ahnsou me re kahngohdiong KAUN-O. 10Sampah sarapeseng oh kadaleirahla, ira eri mehla iangahki Kora oh ienge ko ni ahnsou me kisiniei karongehla me 250; irail eri wiahla mehn kapar ehu ong aramas akan. 11Ahpw nein Kora pwutak ko sohte iang kamakamala.)

12Kadaudok en Simion: peneineien Nemuel, Samin, Sakin, 13Sera, oh Saul. 14Peneinei pwukat koaros patpene me 22,200 ohl.

15Kadaudok en kad: peneineien Sepon, Aki, Suni, 16Osni, Eri, 17Arod, oh Areli. 18Peneinei pwukat koaros patpene me 40,500 ohl.

19Kadaudok en Suda: peneineien Sela, Peres, Sera, Esron oh Amul. (Riemen nein Suda pwutak, Er oh Onan, ira mehla nan wehin Kenan). 22Peneinei pwukat koaros patpene me 76,500 ohl.

23Kadaudok en Isakar: peneineien Tola, Pua, 24Sasup oh Simron. 25Peneinei pwukat koaros patpene me 64,300 ohl.

26Kadaudok en Sepulon: peneineien Sered, Elon, oh Sapleel. 27Peneinei pwukat koaros patpene me 60,500 ohl.

28Kadaudok kan en Sosep, me naineki pwutak riemen, Manase oh Epraim.

29Kadaudok en Manase. Makir, nein Manase, iei semen Kilead oh peneinei me pahn wad met kan arail pahpa kahlap ako tepisang Kilead: 30Peneinei en Ieser, Elek, 31Asriel, Sekem, 32Semida oh Eper. 33Selopehad, nein Eper, sohte nah pwutak ahpw mie nah serepein; adarail iei Mala, Noha, Okla, Milka oh Tirsa. 34Peneinei pwutak koaros patpene me 52,700 ohl.

35Kadaudok en Epraim: peneineien Sudela, Peker, oh Tahan. 36Peneineien Eran tepisang Sudela. 37Peneinei pwukat koaros patpene me 32,500 ohl.

Ih peneinei pwukat me tepisang Sosep.

38Kadaudok en Pensamin: peneineien Pela, Aspel, Airam, 39Sepupam oh Upam. 40Peneineien Ard oh Nahman tepisang Pela. 41Peneinei pwukat koaros patpene me 45,600 ohl.

42Kadaudok en Dan: peneineien Usim, 43irail koaros me 64,400 ohl.

44Kadaudokk en Aser: peneineien Imna, Ispi, oh Peria. 45Peneineien Eper oh Malkiel tepisang Peria. 46Aser naineki serepein men ede Sera. 47Peneinei pwukat koaros patpene me 53,400 ohl.

48Kadaudok en Napdali: peneineien Saseel, Kuni, 49Seser oh Sillem. 50Peneinei pwukat koaros patpene me 45,400 ohl.

51Ohlen Israel koaros patpene me 601,730.

52KAUN-O ketin mahsanihong Moses, ^b 53“Nehkpeseng sahpwo nanpwungen kadaudok pwukat nin duwen tohtohn aramas akan. 54Nehnehn sahpwo pahn wiawi ni usuhs, oh sahpw laud pahn kohieng kadaudok laud, oh sahpw tikitik pahn kohieng kadaudok tikitik.”

57Kadaudok en Lipai, me towe, peneineien Kerson, Kohad oh Merari. 58Kadaudokarail kan iei keimw en peneineien Lipni, Epron, Mali, Musi oh Kora. Kohad iei semen Amram, 59me pwoudiki nein Lipai serepein, Sokeped me ipwidi Isip. E wiahiong Amram pwutak riemen, Aaron oh Moses oh serepein men, Miriam. 60Aaron naineki pwutak pahmen, Nadap, Apihu, Eleasar oh Idamar. ^c 61Nadap oh Apihu mehla ahnsou me ira wiahiong KAUN-O kisiniei me sohte sarawi. ^d 62Mehn Lipai ohl me sounpwong ehu kohda koaros patpene me 23,000. Re wadawad tohrohrasang mehn Israel teikan pwehki ar sohte kin ale sohsohn sahpw nan Israel.

63Moses oh Eleasar me wia wadawad en peneinei pwukat koaros nan patapat en Mohap ni keilen Pillap Sordan sallahng Seriko. 64Sohte ohl emen luhwehdi me iang ntingdier ni wadawad en aramas me Moses oh Aaron wiadahr nan Sapwtehn en Sainai. 65KAUN-O ketin mahsanih me irail koaros pahn mehla nan sapwtehn, ihte me soh, Kalep nein Sepune oh Sosua, nein Nun. ^e